Централната конзерваторска лабораторија при НУ Музејот на Македонија врши заштита на движното културно наследство од сопствените збирки и дава услуги и на други музеи во државата. Таа делува преку конзерваторски истражувања, непосредна и превентивна заштита, едукација, документација и презентација. Во работата се вклучени стручни лица од различни области – текстил, икони, дрво, метал, керамика, стакло и др., а активностите се реализираат преку интердисциплинарна соработка со научни и културни институции. Современиот пристап подразбира анализа на причините за пропаѓање, примена на соодветни методи и материјали и следење на меѓународните стандарди и препораки во конзервацијата.