Вести – Национален музеј на македонија

Самостојна изложба на Христина Иваноска – „Џинови и снегулки”

user11 — Tue, 16 Sep 2025 09:13:31 +0000

Детали од самостојната изложба на Христина Иваноска, „Џинови и снегулки”.

Со задоволство ве покануваме на отворањето на изложбата на 24 декември (вторник) во 19 часот во Музеј на Република Северна Македонија.

Џинови и снегулки | самостојна изложба на Христина Иваноска

Оваа изложба е дел од проектот „Архиви на невидливите 3.0“, поддржан од Фондацијата Heinrich-Böll-Stiftung и Министерство за култура / Ministria e Kulturës. Изложбата е реализирана како соработка помеѓу Center for Research of Nationalism and Culture – ЦИНИК и Фестивалот за феминистичка култура и акција „Прво па женско“ Tiiiit! Inc. со што истата ќе е дел од дванаесеттото издание на фестивалот, чии поддржувачи се Sigrid Rausing Trust и Equality Fund.

Насловот на изложбата „Џинови и снегулки“, реферира на истоимената поема од книгата поезија „Егејска барутна бајка“ на писателот Славко Јаневски, која е објавена во 64-тиот број на „Македонка“ од 1950 година.

Новогодишни украси со етно мотиви

user11 — Tue, 16 Sep 2025 09:00:20 +0000

Во Центарот за музејска едукација при Музеј на Република Северна Македонија на 24.12 и 25.12.2024 година се реализираа работилници на тема „Новогодишни украси со етно мотиви“, со ученици од трето одделение ООУ „Блаже Конески “ и ученици од дневниот едукативен центар „Никона “.
Учесниците изработуваа новогодишни укрaси, лампиони, честитки со етнолошки мотиви – орнаменти, инспирирани од нашите народни носии, везови и ќилими.
На крајот од работилницата учениците ги запишуваа своите новогодишни желби.

Млади европски креатори на културно наследство

user11 — Tue, 16 Sep 2025 08:59:15 +0000

Во тек е новото издание на „Млади европски креатори на културно наследство“, на Европските денови на културното наследство. Оваа креативна активност има за цел да ги поттикне младите луѓе да се ангажираат активно во промовирањето на нивното локално културно и историско наследство, преку изработка на видео, фотографии, цртежи, постери, како и со реализација на други проекти. Во тие рамки, право на учество имаат деца и младинци родени во периодот помеѓу 2007 и 2018 година.
Во селекцијата за наградите ќе бидат земени предвид само групни креации, создадени под водство на координатор. Селкцијата ќе се врши во две старосни категории: деца од 6-11 години и млади луѓе од 11-17 години. За групата од 6-11 години, нема ограничување за бројот на учесници. Во категоријата од 11-17 години, групата треба да се состои од 2-5 учесници, за да биде квалификувана за евалуација на европско рамниште.

На национално ниво, активностите можат да се реализираат во периодот од 1 септември до 27 декември 2024 година. Потоа ќе следи период на селекција на најдобрите творби, а информација за групите наградени на европско ниво ќе биде објавена на почетокот на мај 2025 година.

Се надеваме дека младите луѓе ќе најдат инспирација за својата европска приказна во нашето богато материјално и нематеријално културно наследство, во природните богатства, како и во рамките на дигиталното наследство, како дел од заедничкото, европско наследство.

Улога на координаторите: Координаторите ќе имаат улога во насочувањето на младите учесници, при што ќе се погрижат активностите да бидат безбедни и инспиративни. Исто така, координаторите треба да бидат запознаени со политиките за заштита на децата, вклучително и со Римската стратегија (2022-2027) и Стратегијата на ЕУ за права на децата.

Значајни датуми:

1 септември – 27 декември 2024: Период за организирање на активности и поднесување на креациите

31 јануари 2025: краен рок за национална евалуација и селекција на наградените творби на национално ниво

Февруари 2025: Евалуација на европско ниво

Март 2025 Објавување на наградените креации на европско ниво

Мај 2025: Изложба во Стразбур и посета на овој град за наградените од категоријата од 11-17 години

Стрип Арт – музејска едуктивна програма

user11 — Tue, 16 Sep 2025 08:58:13 +0000

Утре, сабота во 19 часот, во Музеј на Р.С. Македонија ќе биде одржана промоцијата на музејското стрип издание ,,Стрип Арт’’ на група млади автори: Петар Новковски, Ивана Атанасовска и Јован Терзиоски кои под водство на професорот Благојче Наумоски учествуваа во музејската едуктивна програма.

Стрипот е организиран во четири целини кои се разликуваат по темите и изработката на цртежот од авторите.Така што првиот дел е ,,Кокошкини нозе” на Ивана Атанасовска за митот на баба Рога измешан со Јованче и Марика, потоа вториот е ,,Креација на новото божество” на Петар Новковски кој се бави со преплетувањето на митовите и сагите на Норманите со Словенските легенди , трет е ,,Патување на шаманот” епска фантазија за патот на еден моќен шаман по потрага за голема моќ, а четвртиот и последниот стрип е комедија кога Марко Крале би го сретнал Тор и Один на Благојче Наумоски.

Изданието ,,Стрип арт” изобилува со слободно толкување и гледишта на македонските митови и легенди за да бидат трансформирани во еден интересен стрип кој е пристапен и забавен за младата публика. Создавањето на овој стрип беше во рамки на Музејската едукативна програма и се одвиваше во етнолошката музејска сала преку целата 2024 година. Публикацијата е издание на Музеј на Р. Македонија, а уредник е Владимир Благојевиќ.

Eтнолошко документарниот филм – Хембој

user11 — Tue, 16 Sep 2025 08:56:33 +0000

Музејот кој има повеќедецениска продукција на етнолошко – документарни филмови продолжува со презентирање на својата програма од визуелната етнологија и во меѓународни рамки. Eтнолошко документарниот филм – Хембој, од етнологот Елизабета Конеска, во продукција на Музејот, ќе биде прикажан во Љубљана помеѓу 27 февруари и 1 март 2025 на реномираниот фестивал – Денови на етнографскиот филм -ДЕФ, каде што во повеќе од 150 апликации од целиот свет е избран во 15 филмови за финалната програма.
Хембој премиерно беше прикажан во рамките на петнаесеттиот Фестивал на креативен документарен филм МакеДокс.

Македонската публика имаше прилика да го гледа и во Кинотеката на Македонија на јубилејниот 10-ти по ред Меѓународен фестивал на етнографски филм – ЕТНОФФ каде се прикажуваат филмови претставувајќи култури и приказни од целиот свет. Филмот е снимен во Старата скопска чаршија, се прикажуваат трите генерации од семејството Незири кои го работат бојаџискиот занает. Ова е филм за наследството на занаетите и традициите во мултиетничко Скопје.

Проект „Од жито до леб“

user11 — Tue, 16 Sep 2025 08:56:00 +0000

Започнавме со реализација на проектот „Од жито до леб“, со децата од ЈУОДГ „Пролет“. На првиот час кој го одржавме на 05.02.2025г. децата заедно со едукаторите ја разгледаа етнолошката поставка на музејот, научија што е тоа музеј и како треба да се однесуваме при посета на музејот.
На вториот час кој го одржавме на 07.02.2025г. ја раскажавме приказната за житото, преку приказната децата научија како во минатото се обработувале нивите, каква била постапката за добивање на брашно и правење леб.

Меѓународен ден за борба против ракот

user11 — Tue, 16 Sep 2025 08:55:13 +0000

По повод „Меѓународниот ден за борба против ракот“, се роди идејата да реализираме работилници во кои што членовите на здружението „Хема – Онко“ – Здружение посветено на пациенти со рак и нивни негуватели, ќе имаат можност да ја изразат својата креативност.
Денес после посетата на етнолошката поставка на музејот, ја реализиравме работилницата „Арт терапи“, со членовите на групата „Пеперутки“. Секој од посетителите си одбра глинен сад, кој што го обоија со традиционални мотиви.

Голема благодарност до здружението „Хема – Онко“ за успешната соработка, која ќе продолжи и во иднина.

„Од жито до леб“

user11 — Tue, 16 Sep 2025 08:54:38 +0000

Продолжуваме со активностите од проектот „Од жито до леб“ заедно со децата од групата Пајчиња од ЈОУГД „Пролет“.
На 13.02.2025г. учевме како се меси леб и за трите видови на леб – векна, сомун и погача.
На 14.02.2025г. направивме постер преку кој повторно ја раскажавме приказата „Од жито до леб“

Едукативна програма – Проект ,,Од жито до леб“

user11 — Tue, 16 Sep 2025 08:53:46 +0000

Денес ја реализиравме презентацијата на проектот од едукативната програма – ,,Од жито до леб” , со децата од групата Пајчиња од ЈУОДГ,,Пролет”.
На презентацијата тие ни ги раскажуваа работилниците преку нивните изработени дела.

Голема благодарност до децата, наставниот и стручниот кадар на ЈУОДГ,,Пролет” за успешната соработка.

ГОДИШНА ПРОГРАМА ЗА 2025 ГОДИНА НА НУ МУЗЕЈ НА РС МАКЕДОНИЈА

user11 — Tue, 16 Sep 2025 08:49:22 +0000

Оваа програма која е дел од годишната програма на Министерството за култура и туризам на РС Македонија е поддржана со вкупен буџет од 3.000.000,00 денари за програмски активности и 240.000,00 денари за проектот Европски денови за културно наследство. Средствата ќе бидат наменети за реализација на програмските активности во музејската дејност, заштита и конзервација на движното културно наследство.

ГОДИШНА ПРОГРАМА ЗА 2025 ГОДИНА НА НУ МУЗЕЈ НА РС МАКЕДОНИЈА

ПРОЕКТИ

Виртуелна изложба „Македонските бегалци од Втората светска војна и Граѓанската војна во Грција (1940-1949)

Велигден- документарен филм за детска музејска едукација

Репринт на албум на народни носии од 1963 год

Одржување на пункт Ресен

Калеидоскоп од светот на бајките на Димитар Кондовски

Жената во македонското сликарство

Непосредна заштита и конзервација на музејски експонати- збирка ракописни книги на арапски јазик

Извршување на работите на непосредна заштита согласно „Основен проект- Заштита на музејски материјал- грнчарски изработки (народна керамика) од збирката Народна керамика, порцелан, стакло и ликовни дела со етно мотиви

Конзервација на ретки книги

Етнологија за деца и младинци

Запознајте ја виртуелната етнолошка изложба преку знаковен јазик

Презентација и популаризација на комерцијални копии од музејски предмети за 2025 год.

Матична дејност на НУ Музеј на РС Македонија

Кузман Јосифоски- Питу – Животна приказна

Социјалистичко- општествени сведоштва (1945- 1991)

Скицирани таваници

Проект подготовка за – Спомен соба на Вера Кличкова ( продолжение, адаптација, реставрација, конзервација и др.)

Вода- извор на живот, култура, традиција и обичаи

Дигитализирање на 96 мини дв касети од етнолошките теренски истражувања

Примарна заштита и тековно одржување на музејски предмети во етнолошкото депо и постојаната поставка –Етнологија на Македонија

Поглед во минатото преку запознавање на културното наследство

Визуелна приказна

Изложба „Невеста“

Дознај ја тајната на нашите носии

Мистериозен музеј

Европски денови на културно наследство